TRANSPASO DI EDWARDUS LA PROFESANTO

 

HODIE EN LA HISTORIO - Dum la 5ma di januaro 1066 p.K., Edwardus la Profesanto transpasis esante sen filio, tale produktante krizo heredal qua fine abutis a la konquesto Normanda di Anglia. Edwardus la Profesanto, di qua la nomo havas kom origino ke il supozesis vivir quale santulo, quankam il ne esis martiro, esis un de la lasta reji Anglosaxona di Anglia e kustumale konsideresas kom la lasta rejo di la Domo di Wessex. Kande Edwardus mortis pro serio de ataki cerebral en 1066, la 'Witeagemot' (asemblo di saja viri) kunvenis e selektis Harold Godwinson por sucedar a lu. Il kronizesis en l'Abadeyo di Westminster. Nihilominus, Harold desvinkis e mortigesis, dum ca ipsa yaro, dal Normandi komandita da Guglielmus (William) la Konquestanto lor la Batalio di Hastings.

Quik de la 12ma yarcento, historiisti pozis su questioni pri la intenci di Edwardus por lua heredo. Ula skolo di penso apogas la tezo, favoranta la Normandi, ke Edwardus sempre deziris havar Guglielmus la Konquestanto kom heredonto, per aceptar la aserto mezepokal segun olqua Edwardus rezolvabis restar celibulo ante lua mariajo, ma la plu multa historiisti kredas ke il esperis havar heredonto qua sucedus a lu. Sur la pikturo esas : Edwardus la Profesanto sur la trono e Harold Godwinson, tapeto di Bayeux.