mardi 21 juin 2011

LA ANCIENA KLASIKA LINGUI CHE-TELEVIZIONE

xxx:::xxx

Dum la pasinta saturdio vespere esis dokumentala filmo, che la Europana kanalo ARTE, pri la destino di Roma. Parolesis pri la sucedo di Caesar e la kombato inter Oktavius ed Antonius por la dominaco dil Imperio. Ita kombato finis en -27 a.K. lor la navala batalio di Actium e la vinko di Oktavius (Augustus). Ica temo esas certe interesiva e, precipue, on esforcis en la filmo esar honesta e yusta ed on probis rehabilitar Antonius e Kleopatra ; ma la aparta intereso di ca filmo jacis en la fakto ke onu ne parolis en ol en la moderna lingui, ma nur en la Latina e, por la ceni havanta loko en Egiptia, en la anciena Greka. Nur la subtituli, por tradukar la dialogi e la diskursi, esis en linguo di nia epoko. Ico ne esas absolute unesma tala reprezento, nome, kelka yari ante nun, esis filmo pri la sufrego di Kristo en la originala Latina ed Arameana lingui. Do, eventas pokope aprobinda evoluciono qua tendencas montrar la homi dil Antiqua Epoko en lia reala vivo-kadro e lingui. Ol esas simila ad olta qua eventis dum la XIXma yarcento pri teatraji reprezentanta la homi dil Antiqua Epoko, nome tillore la aktori pleis ceni pri historiaji dil Antiqua tempi kun vesti di la moderna tempo. On divenis plu realista e serioza dum la XIXma yarcento. Nun, por tala filmaji, on tendencas, quankam ne ja tre audacoze, uzar la linguo di la tempo aludita kande ol konocesas.
Ita filmo "La Destino di Roma" esis marveloza, ne nur pro ke ol bone explikis la situeso historial dil koncernata epoko, ma anke pro la uzado di la lore uzata idiomi. Ultree, on preparabis la aktori parolar bone e segun la reguli (precipue la pronunco) ita lingui. Ico esis entuziasmiganta ed on havis sentimento pri plu granda autentikeso, e, fine ma ne min importante, ita lingui, bone parolata, esis tre bela. Precipue la Greka, olqua havis eleganteso e rafiniteso supera a la Latina ed esis vere digna esar korto-linguo. Ma, mem tale, la Latina restis tre bela idiomo, potenta e sonora, multe plu bela ed eufonioza kam la senviva Latina docata da nulsavanta instruktisti. Un de la aktori (ilta qua pleis la rolo di Antonius) esis tante entuziasmoza, ke, pos la filmifo, il deklaris ke la Latina devus divenor la komuna linguo di Europa. Evidente, il ne konocis la existo di nia Linguo Internaciona. Domaje, nam ol esas same bela kam la Latina ed ol esas multe plu facile lernebla...

xxx:::xxx