LA MERKATI DI KRISTNASKO

:::>>><<<:::

Difuzesas en Francia nun, depos un yardeko, novajo simpatiinda ed agreabla, nome la merkati di Kristnasko. Olim, ita Kristnasko-merkati esis tote nekonocata ecepte en Alzacia en la urbo Strasbourg. Dum la Mezepoko, ibe, existis merkati (kun butiki quale oli povis existar dum la Mezepoko) lor la periodo di santa Nikolaos (santulo tre famoza en est-Francia). Dum la yarcento XVI, eventis la protestanta Reformo ed ol adoptesis en Strasbourg. Pro ke la santi ne agnoskesas dal protestanti, la nomo di merkato di santa Nikolaos divenis tre ne-oportuna. Quale agar ? Pro ke la periodo di santa Nikolaos esas tre proxima ad olta di Kristnasko, segun sugesto da evangeliista protestanta pastoro, la urbo Strasbourg rezolvis en 1571 chanjar la nomo di merkato di santa Nikolaos ad olta di merkato di Kristnasko. Tale, la komerco povis pludurar existar sen ofensar la adepti di la nova vinkanta religio.
Ica merkato di Kristnasko permanis dum plura yarcenti e prosperis en Alzacia. Dum la fino dil XXma yarcento, ol developesis per divenar splendidajo konocata ne nur en Francia, ma anke ulagrade en la tota mondo, nam turisti di la tota mondo venis a Strasbourg dum ita periodo. Lore, ye la extrema fino dil XXma yarcento, ica merkati komencis difuzesar ed existar en diversa altra regioni di Francia. Kelka dii ante nun, me iris a la merkato di Kristnasko havanta loko en la esto di Paris. Ico esis agreabla e simpatiinda loko, tre gastamika, quankam sen aparta splendideso, ube on povis komprar omnaspeca necesaji por pluagreabligar la Kristnasko-festo. Ne-eviteble me vidis kelka charmanta yuna Japoniana turistini italoke. Evidente ico esas komercala entraprezo, qua havas nun granda suceso, malgre la quaza desaparo dil Kristana fido. Ma la tradicioni e kustumi vivas plu longatempe kam la religiala fido e posvivas ol...

:::<<<>>>:::