TURISMO EN LA LOIRE-VALO

xxx:::xxx

Meze di Francia, esas fluvio qua esas, se me bone informesis, la unika granda fluvio neamansita di Europa. Nome, on lasis lu en lua naturala stando, sen kaptar lu per digi e kanali. Olua cirkondanta regiono esas splendida kun tre agreabla ruro, bel anciena urbi e splendida kasteli. Olim, ye la fino dil Mezepoko e dum la Renesanco-tempo, la reji di Francia esis nomadi qui vagadis tra ita regiono e konstruktigis italoke rejala kasteli. Kelka dii ante nun, me vidis emiso pri ta regiono che televizional kanalo. Ico memorigis da me anciena memoraji, nam me turismis ibe dum la yaro 1982 e me vizitis plura marveloza urbi e monumenti. Men impresis anke la cielo, qua havas beleso e lumozeso netrovebla altraloke, adminime en Francia, nam me lektis ke ica cielo pro lua pureso tre similesas olta di Toskana en Italia. Ico explikas ke la reji di Francia dum la Renesanco (yarcento XVI) povis facile atraktar adibe la Italiana artisti qui adaptis su tre rapide ad ica regiono di meza Francia.
Precize pro ke la Loire-valo esas en la mezo di Francia, ol esas plu Franca kam la cetera provinci di ca lando. Ol esas nek tro ardoroze sunoza, quale esas la sudala regioni di Francia qui esas ja preske Italiana o Hispana, nek tro kolda e pluvema, quale esas nord-Francia, ja preske Germana od Angla, carelate. E la Franca linguo parolata ibe esas tre eleganta. Me aludis la cielo, ma anke la kolori dil peizajo esas tre pleziva, nome oli esas diskrete varma e sunoza. Ulfoye (lo esis dum la yari 1970), konocero di Japonia raportis a me ke la Japoniani amas bela e diskreta kolori. Lore, me dicis a lu ke li devus prizar la regiono di Loire-valo. Me ne eroris, nam plu tarde vizitante plusafoye ita regiono, me konstatis ke esis tre multa Japoniana turisti. To quo men tre impresis, esis la fakto ke malgre ke li esis nombroza e kondutis quaze li esus heme, tamen la Japoniani esis nule invadema, quale esabus altra turisti en simila kondicioni. Kad on debas ico a la fakto ke la Japoniani esas tre polita o ke li esas tre taktoza ? Me ne savas e ne povas judikar. Me ne savas anke, kad ico esis nur modo o kad la Japoniani duras venar a la Loire-regiono.
Verdire, esis multa turisti ibe, kande me vizitis la kasteli e la splendida peizaji. Babilante kun Usanini ed Australianini (esis multa mulieri), me konstatis ke li havis tre alta kulturala nivelo, quankam diferanta de olta dil Franci, nome li esis savoza pri kozi quin ni ne savas multe e nulsavanta pri kozi quin ni konsideras kom importanta.
Ico esas tote altra turismo kam olta quan ni havas en Paris. En Parisana regiono, me konstatas ke veneskas, nun, sempre plu multa yuna Chiniana turisti e li semblas prizar vere Paris e lua cirkumajo. Kad li venas anke en la Loire-valo ? Forsan no, nam li ne esas tre kulturoza.

xxx:::xxx