EKOLOGIALA PRODUKTURI

<<<:::>>>

Pasinta-sundie, me iris a Paris che la expozeyo dil Pordo di Versailles, por vizitar expozo pri ekologiala produkturi ad-ube me invitesis venar. Me sempre prizas vizitar bone organizita alternativa medio, qua revigas pri la posibleso di alternativa mondo ed ube me opinionas ke alternativa linguo a la Angla mondolinguo, quale esas Ido, anke povus havar lua plaso. Multa produkturi esas interesiva e venas de la tota mondo. Precipue interesiva esas la produkturi propozata danke la equitatoza komerco existanta inter la povra landi dil Triesma Mondo e la developita landi. Inter la produktanti di ta produkturi e lia komercala kompranti dil developita landi, komuna linguo facile lernebla e komprenebla esus tre dezirinda ed havus futurala perspektivi, nam la Angla ne savesas e ne povas lernesar da homi, qui havas nur mikra instruktiteso e disponas nur poka tempo por linguo-lernado. Me iris a kioski ube vendesis libri, e me kompris libro pri la singladia vivo en India nunepoke. Me pensas ke en tala kioski lernolibri pri Ido e literatureto en Ido povus propozesar a la vendo. Regretinde, ne ja existas tala libri en la Franca e me esas la unika Idisto en Francilia (Parisala regiono). Se la cirkonstanci posibligus lo a me, me devus irar a Berlin, por vizitar la Ido-amiki en Berlin ed helpar li, kande li expozas Idaji por reklamo e propagado di nia linguo. Forsan me povus multe lernar de li. Regretinde, dum-instante, me personala vivo-cirkonstanci ne posibligas ico a me. Me povas nur esperar ke, uladie, me travivos plu bona tempi. Omnakaze, me revas trovar moyeno por difuzar e vivigar Ido en la medii qui interesesas pri ekologio ed equitatoza komerco e qui semblas a me esar posibla gastigeyi di nia preferata idiomo.

<<<:::>>>