mercredi 8 avril 2009

'ELEKTROFONO'

xxx:::xxx

Pro ke mea anciena 'elektrofono' ne plus funcionis de longa tempo e ke me ne plus povis askoltar mea anciena e bela diski nekompakta, me trovis recente reklamo por klasika 'elektrofono' che la revuo "Les veillées des chaumières" (La vesperi che la palio-domi)e me komendis ol. Konseque me recevis olu kelka dii ante nun.
Me itere askoltas diski ofte multe plu bela e diversa kam le moderna KD, ma me havis la kuriozeso regardar de-ube venas ica mashino. Sen granda surprizo, me lektis ke ol fabrikesas en Chinia. Pro la mala qualeso dil Chiniana produkturi, ol duros probable nur dum kelka yari. Ma tamen esas bona juar itere mea favorata diski.
Nihilominus*, me opinionas ke esas tre shokanta ke tala bezonaji ne plus fabrikesas en Europa. Pro quo ? Pro ke la produkturi fabrikata en Chinia esas plu chipa ? Ma ye la vendo, li esas same chera kam esis olim la Europana simila produkturi e lia qualeso esas kustumale tre inferiora. Lo esas afliktanta konstatar ke dum tempo di ekonomiala e financala krizo, di generala povreso, la Europani ne plus darfas produktar ipsa to quon li bezonas ed ipsa inventis. La fola e miskomprenata globalismo dil Siniori di lo "politically correct" havas devastanta konsequi.

xxx:::xxx

1 commentaire:

  1. Kara Jean, me timas ke vu havas kelka prejudiko kontree Chiniana produkti. Me ne volas dicar ke li esas tre bona, ma fakte, li ne esas tre mala e divenas plu e plu bona irgayare. Triadek yari ante nun simila prejudiko esis kontree japona produkti, ma nun omni savas quale bona esas japona automobili, japona tele-video-audio-tekniko e cetere. Dek yari ante nun esis sama prejudiko kontree produkti koreana, ma nun la qualeso di koreana produkti esas sama alta kam di europana, amerikana o japona produkti.
    Okazione, chiniana produlti plubonigos til sama levelo di qualeso. Fakte, ofte la qualeso di tekniko esas sama kam en US - exemple, mea iPod esas asemblita en Chinia - ma me esas certa ke sama teknologii e sama roboti esas uzata en Chinia por facar iPod kam li esis facita en US antee.
    Me esperas ke vua elektrofono duros funcionar longe e vu juos vua diski nekompakta kustumalemaniere dum multa yari :)

    RépondreSupprimer