LA BELA OKULI DI CORDOBA

HISPANIA : Ca urbo Andaluziana posedas richeso historial ed arkitektural remarkinda.– Bonveno en Cordoba, civito di tolero e di harmonio inter la populi e la religii. Hike, en sud-Hispania, mohamedani, hebrei e katoliki kunvivis longatempe en konkordo preske perfekta. Ita uniono posrestas ankore hodie en la richeso historial ed arkitektural dil centro di Cordoba, rangizita che la patrimonio (heredajo) mondal dil UNESKO. Komencante per la moskeo-katedralo, konsiderata kom la monumento islamal maxim importanta di Ocidento,kun olua eleganta foresto petra de koloni.
Stradeti streta e baroka
La moskeo-katedralo, un del maxim bela edifici religial di Europa
Dum promenar interne dil moskeo-katedralo, on impregnesas per la historio di Cordoba e di tota Andaluzia. On atingas la kolmo dil baroka stilo Araba en la maqsura e la mihrab : muluri, mozaiki Bizancana, arabeski ed epigrafi en literi kufia (Araba) intermixesas en streta harmonio. Pose on vagados en la stradeti streta e baroka di La Juderia, la anciena quartero Hebrea, qua aspektas tote oriental. La sinagogo, la casa Andalusi e la casa de Sefarad memorigas pri la historio di ca parto del urbo.

On povas anke marchadar en la quartero di San Castillo famoza por lua florizita patio-i. On haltez an la numero 50, calle San-Basilio. Pro lua sulo ek ronda rivero-stoni e lua muri kalkizita, kovrita per poti de geranii e de pelargonii (« pelargonium »-i) blue farbizita, ol esas un de la postkarti di Cordoba. Fine, pro quo ne finar la jorno per instanto di destenso en la hammam (balneyo segun Araba stilo) Al Andalus. La dicita loko es splendida pro lua stilo oriental havanta arkadi ed azulejo-I (ornita kareli fayenca difuzita en sud-Hispania e Portugalia), ca omno lumizita per bujii. Magiala ed eklandiganta ico esas.