VARMESO-REKORDO VINKITA

Hodie, 25ma di julio, ye 13 kl. 42 en Paris, la varmeso-rekordo anciena vinkesis e la temperaturo atingis 41° Celsius. Ed ico ne finas, nam on previdas ke dum la posdimezo la temperaturo iros til 42°. Nulatempe depos ke on enrejistrigas temperaturo en ta urbo (depos 1873) tala varmeso konstatesis. Nur en 1947, la temperaturo esis plu alta kam 40°, t.e. dum la 28ma di julio di ta yaro, la maxim alta temperaturo esabis 40,4°. Ma cayare en 2019, ol divenas rekordo obsoleta. Artiklo en la Franca. Por konsolacar la Franciliani, onu aludas la morgala temperaturo qua esos klare plu milda. 

L'EBRIESO

La ebria viro ne savas to quon lu agas

Karolus (Karl) XII qua esis rejo di Suedia, uladie perdabis, pro lua ebrieso, la respekto quan il devis al rejino, qua esis lua avino ; elu retretis tre chagrenita ad elua apartamento.

Dum la morga dio, pro ke el ne vidigis su, la rejo questionis pri la motivo di co, nam il obliviabis omno.

On savigis ca motivo da lu.  

Il iris a la chambro di ca altaranga persono :  

« Siniorino, il dicis, me jus saveskis ke hiere me kondutis male a vu, me venas por demandar pardono, e, por ne plus falar aden ca kulpo, me deklaras a vu ke me drinkis vino hiere lastafoye en mea vivo ».

Il egardis fidele la paroli dicita da il ca-okazione.

Depos ita dio, il drinkis nur aquo e lua sobreso esis tala ke ol kontributis same kam la militistal exerci igar ilu forta e robusta.

Segun VOLTAIRE

LA BONA ANCIENA TEMPO

Kande me esis puero dum la yari 1950ma, la someri esis tre pluvoza ; la apari dil suno esis skarsa. Ma, lore (kande la suno brilis), esis ideala temperaturo ne tro varma. Tale, me regretis ke la vakanco pasis sen povar juar ol multe, nam la pluvo impedis profitar la somero ed ico esis tre depresanta. La adulti parolis pri la preirinta yardeki kande esis varma sunoza vetero e mem akra sikeso. Li ne semblis esar nostalgioza pri co. Pro ke me ne savis quo esas sikeso e varmeso me revis pri oli e me regretis travivar apokalipsala tempo di mondo-krulo. Dum la yari 1960ma, la situaciono, tamen, amelioresis e se la vintri divenabis tre kolda la someri divenabis sunoza e kun normala varmeso. Tamen, itaepoke, mea matro, qua laboris en hospitalo, naracis a ni ke oldino evanta plu kam 80 yari e qua sejornis ibe plendabis ke onu ne plus havis la bela varmega someri quale olim kande on sufokis pro la varmeso. Mea matro adjuntis : "El esas okadekyarulino, forsan pro la evo lua sango ne cirkulas plu bone ed el divenis koldo-timema." Ma la oldino ne esis fola e dum la yari 1970ma la someri ridivenis varma "quale olim". Nun, pro la pluvarmesko klimatal, la someri esas sempre plu varma e penoza e me regretas la yari 1950ma e la somerala pluvo qua posibligis bone dormar e durar esar aktiva. Ita epoko divenis por me la "bona anciena tempo".

NEDEPENDANTISMO EN OCITANIA

La Partiso dil Naciono Ocitana (PNO) t.e. partiso qua esas necelite nedependantista, celebros morge lua 60ma aniversario en la urbo Rodez. Me ne komprenas pro quo tala partiso toleresas en Francia, nome segun la lego la Republiko di Francia esas "una e nedividebla". Do, nula partiso nedependantista devus toleresar. Ma ico tamen eventas. Certe la nedependantisti di Ocitania esas nur 1% o 2% di la habitantaro, qua, cetere, parolas la Franca kom matrala linguo depos plura generacioni e la sud-Franci nule deziras sakrifikar su por nedependo qua adportus nulo a li. Ma en perspektivo di longa tempo, la aganta minoritati povas esar danjeroza. Notinda, ka ca nedependantista movado Ocitana tre helpesas dal Hispana Kataluniani qui revas pri fratala Ocitania asociita a lia lando. Duminstante ica perspektivo esas tre fora, nam la Ocitani konsideras su kom sud-Franci e savas ke la Kataluniani odias la Franci. Ma pro quo la Kataluniani volas kurajigar tala movado, qua nule aprobesas dal Ocitani ? Ico semblas esar batalio kontre la vento-mueleyi.

OCITANIA

Me konstatas ke me transmisas sat multa artikli pri Ocitania. Me devus krear FB titulizita IDO-OCITANIA, ma me ne havas la kurajo agar tale, nam me interesesas nur tempope pri Ocitania.Tamen, me konstatas sempre plu ke la nord-Franci e la sud-Franci esas du diferanta populi, mem se li esas membri dil sama naciono. Un de la granda diferi esas ke li esas (la sud-Franci) multe plu dotata muzikale ed havas kanto-vokeso quan la nord-Franci ne havas. En sud-Francia (quale olim en Germania) eventas ke grupo de personi kantas komune kansono folkloral. En nord-Francia, ico ne plus existas de longa tempo (se ico irgatempe existis ibe).

Yuna Ocitanisti qui volas rivivigar la linguo Ocitana