LA KATOLIKA EKLEZIO LIBERALA

<<<:::>>>

Tote hazarde, me saveskis pri l'existo di ca Eklezio per recevar revuo sendita gratuite dal ambasaderio di India al interesati pri India e lua kulturo. En ita jurnalo lekteblesis, ke konfero pri mortinta persono membro dil Teosofial movado eventabis en loko posedata da ta Eklezio. Me divenis kurioza e serchis sur la interreto. De ito aparis ke ica Eklezio esas tre tolerema relate la kredo di lua adepti ed aceptas eventuale, ma ne kom dogmato, l'ideo dil riinkarnaco. La liturgio esas olta dil katolika Eklezio Romana ante la koncilo Vatikano II, ma en la lokala idiomo e ne en la Latina. Hiere sundie, me iris a la kirko di ca Eklezio qua jacas diskrete en la mezo di Paris. Ibe esis forta proporciono de homi havanta Afrikana origino ed anke kelka personi de Indiana origino. Quale por omna mikra movadi, la homi semblis esar sincera ibe e la etoso esis plu kordiala kam en granda kirki. Me volas skribar nulo pri la liturgio qua esis decanta, ma sen la beleso dil integrista katoliki di Santa Nikolaos dil Kardoneto (ma iti laste dicita havas financala moyeni por havar bela kori ed apta orgeno-pleanti). Tamen tre plezis a me la prediko qua nule esis tedanta e senfina, quale kustumale dum la katolika mesi, oli esez olti da tradicionalisti o dal koncilo-partisani. Precipue tre plezis a me, ke la sacerdoto dicis ke la religiala fido esas konquesto di la religiano per lua personala spiritala laboro e ne nur la ago da Deo qua selektus certena personi e vovus le altra a la nekredemeso ed inferno. Existis anke prego por bona riinkarnaco. Me esas seduktita ma ne savas quon opinionar exakte, nam me ne plus esas tre yuna e me savas tro bone ke la aferi qui semblas dekomence esar marveloza, ofte kande onu konocas oli plu bone divenas pose tre deceptanta pro mala lateri quin onu ne quik vidabis o quin onu ne volabis perceptar. En la Franca patuazo* existas expresuro por ico : "La mariée était trop belle" (La yuna spozino esis tro bela). Segun la informi trovata che la interreto, ica Eklezio esis en la XVIIIma yarcento disidentajo dil Romana katolika Eklezio en Nederlando. Pose ol influesis dal Teosofiisti ed ico produktis skismo. Cetere pro ke ica Eklezio ne havas papo e klerikaro guidante olu per fera manuo, e ke ol esas liberala, nule esas astoniva ke eventez skismi. Ma pro ica libereso, vera spiritala vivo permanas, dum ke en funcionerala Eklezio la spiritala vivo petrigesas e cesas existar reale. Cetere, la fakto ke ita Eklezio havas bona relati kun la Teosofiisti (qui havas doktrino tre proxima al hinduismo) tre plezis a me. Nome, me preferabus esar hinduisto, qua esas vivanta ed atraktiva religio kun joyoza e gaya Dei, prefere kam Kristano, pro ke ica laste dicita religio esas tro austera e serioza sen esar plu vivanta o plu savoza. Ma onu ne selektas la geografiala loko ube onu naskas. Tamen, tale pozesas la problemo di la religio quan onu preferus praktikar. En nia Europana landi, precipue en west-Europa, on havas nur la posibleso irar a la katolika meso di Vatikan II, pro ke esas nula altra posibleso. Ja esas tre desfacila trovar tradicionalista parokii. Yes, ma lia doktrino esas tro severa e poke atraktiva sen irga indulgemeso por la homala feblesi. Mem, la sacerdoti postulas ofte de la simpla homi ke li havez vertui e kapablesi superhoma. Ne esas misterio ke kande sacerdoti qui havas bela ritui e ceremonii promisas tro facile la infernala flami poreterne a lia sorgati, ici ne esas tre entuziasmoza e divenas nekredanti. Iti qui esas partisani di Vatikan II esas mem plu mala, nam li ne havas bela ritui e kanti e li ofte mokas necelite lia sorgati. Li mem klare montras ke li ne egardas serioze la religio. Anke pro ico la homi divenas nekredanti, agnostiki ed ateisti. Tale mortas la Kristana religio e la Ocidentala civilizuro di qua ol esas l'anmo. Ma existas altra posiblesi. Se multa homi savus ke existas ulo quale la katolika Eklezio liberala, li certe divenus plu pronta restar religiala praktikanti. Ma la liberala e tolerema movadi esas skarsa ed esas tro multa danjeroza sekti... Fakte sen la revuo sendita dal ambasaderio di India, me savabus nulo pri ca katolikismo. Me ne povas anke predicar kad me divenos un de lua adepti.

<<<:::>>>