xxx:::xxx
Hiere, me iris a la ferio di Paris. La ferio di Paris esas expozo qua eventas singlayare inter la lasta semano di aprilo e la unesma semano di mayo. Ad ica expozeyo venas produkturi di la tota mondo : nutrivi, vini, koquarti e gastronomii, mestieraji, mobli, tekniki edc. Me pasis agreabla posdimezo per vizitar ita expozeyo. Che la Rusa butiketo pri Rusa artaji e mestieraji, me trovis charmiva rustika medalio mestierala ek arjentano reprezentanta unlatere la deajo Perun. Ye la altra latero esas videbla sunala roto e kelka glani. Ici esas simboli. Deo Perun, pri qua me ja lektis ulo dum mea studio pri historio lor mea adolecanteso, esis la Rusa Deo suprega, il esis anke la Deo dil tondro, dil fulmino e dil tempesto. Ma ne nur, il esis anke la Deo dil agrokultivo. Ne sen simileso kun Jovo (Jupiter che la Romani, Zevs che la Greki). Se por diversa motivi la Kievana princo Vladimir ne judikabus kom oportuna konvertesar a la Kristanismo, lore Perun esabus la deajo reprezentanta la Rusa tradiciono. Tamen la paganismo ne desaparis subite, ol mantenesis celite e poslasis kelka traci ankore vivanta nun. Ico, cetere, nule impedis la Rusi esar bona Kristani ortodoxista nam li pluduris praktikar diskrete kelka formi di paganismo dum tamen irar a la Kristana meso. La homala anmo ne esas rekte iranta ma agas ofte por trovar meza solvuri inter semblante ne konciliebla opozanta principi, quin olu prizas. Me kompris la bela arjentana medalio reprezentanta Deo Perun e me regardas ol kun plezuro.
xxx:::xxx
Inscription à :
Publier les commentaires (Atom)
Interesive, ke en diversa urbi europana eventas simila ferii. Me nun habitas en Fuengirola, relative mikra urbo en Hispania, e ni havis 'Feria do los peblos', ube reprezenteri di cirkume 30 landi (e regioni Hispaniana) havis sua butiketi por monstrar sua kulturo. On povis regardar tradicionala danci, askoltar kansoni e probar nacionala kocinaji. Regretinde, ne esis la Rusa butiketo, ma me tre prizas kelka altri.
RépondreSupprimer