LA FATO TRAGEDIAL DI JANE GREY REJINO DI ANGLIA

HODIE EN LA HISTORIO - Dum la 12ma di februaro 1554, un yaro pos postulir la trono di

Anglia, Siniorino Jane Grey senkapigesis pro trahizo lor ke el evis 16 yari. Siniorino (Lady) Jane esis nobelino Angla e "de facto" monarko di Anglia depos non dii de la 10ma di Julio til la 19ma di Julio 1553. Kom pos-nepotino di Henrikus (Henri) VII per ilua juniora filiino Mary, Jane esis kuzino de unesma rango olim eskartita da Edward VI. En mayo 1553, el mariajesis a Sinioro Guildford Dudley, qua esis juniora filiulo dil chefa ministro di Edward VI, John Dudley, Duko de Northumberland. Kande la rejo evanta lore 15 yari esis mortonta dum junio 1553, il nominis Jane kom sucedanto dil Krono en lua testamento, tale refutante la postuli da ilua mi-fratini Maria (Mary) ed Elizabeth per la Triesma Edikto di Sucedo. Jane enkarcerigesis en la Turmo di London kande la Sekreta Konsilantaro rezolvis chanjar lua orientizo e proklamis Maria kom rejino ye la 19ma di Julio 1553. Jane akuzesis pri Statala trahizo dum novembro 1553, to quo duktis a judicio di morto-puniso. Lor la matino dil 12ma di februaro 1554, Jane duktesis a la Turmo Verda, interne di la Turmo di London, e senkapigesis. Kom fervoroza protestantino, el konsideresis postume ne nur kom viktimo politikal ma anke kom martirino. Pikturo : La Mortigo di Siniorino Jane Grey, dal Franca piktisto Paul Delaroche, 1833.