PIKTURI FAMOZA :

Juliette RECAMIER da GERARD

 

Sen talento specal, sen nobeleso, Juliette Récamier divenis la maxim admirata muliero di elua epoko, ed aquiris Europana reputeso. Bela elu certe esis, ma existis mulieri tam inteligenta e plu bela kam elu, qui poslasis nula nomo en la historio. Ma el havis charmo super omna komparo, benigneso sen limiti ed, indijanta nobeleso, el posedis nobleso ed eleganta manieri… Kande, en 1806, elua patro, administranto dil posti, revokesis e ke elua spozulo perdis sua richeso, el renuncis la luxo kun rideto. Tale el konservis elua omna amiki.

Juliette Récamier esis konstante cirkondata da multega admiranti, e tamen elua vivo esis nereprochebla. On asertas mem ke lua mariajo restis « blanc », t.e. ne-« konsumata ». Kande el evis 15 yari el spozeskis bankisto evanta 42 yari, Jacques Récamier. Certena historiisti , por explikar ta stranja fakto, dicas ke sioro Récamier esabis l’amoranto dil matro di Juliette e konseque il esis la patro di ca yunino. Per ita mariajo il volis nur transmisar ilua richeso a lua filiino sen agnoskar elu legale kom lua decendantino por ne deshonorizar la matro. Ico esas preske historio por folietonisti !

Inter elua nombroza adoranti, du esis lua preferiti : princo August, filio dil rejo di Prusia, e Chateaubriand. El konoceskis l’unesma dum ilua kaptiteso en Francia kom milit-kaptito, ma per amuziva kaprico dil fato la vera kaptito esis Juliette ipsa, la maxim famoza Francino di ta tempo qua konquestesis dal Prusiano. El koncesis a lu la unika kiso quan el donis a viro. Elu tamen ne divenis princino, ne pro ke elua spozulo refuzis la divorco ma pro ke el refuzis ruptar la ligilo unionante el a viro por qua el havis tre granda estimo.

Plu tarde altra amikeso, preske pasionoza, ligis el a la granda skriptisto Franca Chateaubriand, quan el gastigis en elua hemo dil « Abbaye au Bois ».

Chateaubriand divenis infirma e nekapabla marchar sen servisti ; siorino Récamier divenis blinda pro la katarakto. Tamen il ofris ad elu, evanta 72 yari, mariajar su kun elu kande el divenis libera pos la morto di elua spozulo. El refuzis e kurtatempe pose li amba mortis preske samatempe.

Pri Juliette Récamier on konocas plura famoza portreti piktita da David e da Gérard. Olta da David, en qua Juliette jacas sur lito Romana, esas la maxim famoza. Tamen nia damo preferis la pikturi da Gérard de qui ni donas supre un riprodukturo segun desegnuro da Chevignard. Gérard, quale lua maestro e docisto David, apartenas al grupo dil piktisti nomizita klasika, qui serchis lia inspiro en la Antiqua Epoko, ma ilua portreti esas plu familiara a ni kam olti da David. La piktado klasika regnis dum la tota vivo-tempo di Napoléon, aproxime de 1770 til 1820.