Existas mil e kinacent templi en Varanasi ; la plu multa de li konsakresas a Shiva Vishwanath, protektanto di Varanasi, olqua esas altra nomo di Shiva.
Ol esas la maxim sakra de omna templi di ca loko, ed ol havas interesanta pasinta
tempo historiala. Segun la tradiciono, ica santuario ja esis famoza duamil yari ante
nun. Onu kredas ke ol destruktesis plurafoye dal Mohamedana suvereni, til la tempo kande imperiestro Aurangzeb imperabis ke onu edifikez moskeo sur olua spaco. La moskeo di Gyan Vapi, stacanta dop la templo inkluzas nombroza elementi dil originala
santuario.
La nuna templo di Vishwanath, en la nemediata vicineso dil moskeo di Aurangzeb,
konstruktesis danke la sorgado di rejino Ahalyabai dil Stato Indore en la 19ma yarcento.
La Shikka suvereno di Punjab, rejo Ranjit Singh donacis la 750 kilogrami de
pura oro per qua la kupoli e la flechi dil edifico kovresas.
Tamotive onu nomizas kustumale ica templo : «La orea templo». La religiani kargita per flori, per sakra folii, per frukti, per sukraji kun lakto, e per poti ek flava kupro od ek terakoto plena de aquo dil fluvio Ganga, eniras la templo ed adoras Shiva. Li prosternas e su santigas per la sakra polvo templala. Li iras de la templo a lia hemo kun la konvinko ke
Shiva, la Liberiganto, liberigos li de la kateno dil riinkarnaci.
La ne-hinduisti ne darfas enirar ica templo. Por bone vidar la angul-turmi e la somito dil templo, onu mustas acensar al unesma etajo di la domo stacanta opoze al edifico, nam ica granda templo situesas en streta stradeto.
Segun libreto pri hinduismo.
Aucun commentaire:
Enregistrer un commentaire